PACIFIC ISLANDS REPORT

Pacific Islands Development Program/East-West Center
With Support From Center for Pacific Islands Studies/University of Hawai‘i

MELBOURNE, Australia (Radio Australia, June 30) - Tupela man long Fiji bai go kalabus inap long taim tupela i dai, bihainim pasin bilong tupela long ku long yar 2000.

Kot i salim Jo Nata, man husat i bin wanpela Public Relations konsaltan bipo, na Timoci Silitolu husat i bin wanpela politisen bipo, igo kalabus bihainim ol sas oli bin sasim tupela long en long 'treason', kriminal pasin agensim kantri.

Jastis andrew Wilson bilong Fiji Hai Kot i bin tokim Silatolu olsem, em i mas go kalabus inap long nainpela (9) yar na i tokim Nata - yu mas go kalabus inap long sevenpela (7) yar.

Taim em i tokaut long mekim-save bilong tupela, Jastis Wilson i tok olsem, Silatolu i bin halvim ku mo winim Nata taim dispela ku i bin rausim Democratic People's Coalition gavman long yar 2000.

Jastis i tok strong olsem, dispela tupela man i bin wokim wanpela nogut kriminal pasin tru agensim kantri na pipal bilong kantri, olsem na tupela i mas go kalabus inap long taim tupela i dai.

Jastis Wilson i bin tokim tupela olsem, gavman bilong Praim Minista Mahendra Chaudhry long dispela taim na kantri olgeta, i bin trust o bilip long tupela, tasol tupela i bin bagarapim dispela trus.

Em i tok olsem, tupela man ia i narakain liklik long ku lida George Speight long wanem George Speight i bin ring lida taim tupela i bin halvim tasol.

Tasol, Jastis Wilson i tok tripela man wantaim i bin gat wanpela tingting tasol bilong usim wanpela sivilian ku long rausim Coalition gavman.

Radio Australia: www.abc.net.au/ra 

Copyright © 2003 Radio Australia. All Rights Reserved